დუეინ ჯონსონმა ჰობსი და შოუს მეორე ნაწილზე ისაუბრა

დუეინ ჯონსონმა "ფორსაჟი: ჰობსი და შოუ"-ს მეორე ნაწილის შესახებ განცხადება გააკეთა. მსახიობმა აღნიშნა, რომ უკვე ემზადება ახალი ფილმის გადასაღებად და ეს მისთვის ძალიან ამაღელვებელია. ამჟამად პროექტის სავარაუდო მონაწილეები ფილმის კონცეფციას ათანხმებენ, ასევე მიმდინარეობს მოლაპარაკება ფრანჩიზის გაგრძელებაზე.

ამ ეტაპისთვის ფილმს არც რეჟისორი ყავს და რა თქმა უნდა პრემიერის თარიღიც უცნობია. სავარაუდოდ პანდემიის მიერ შექმნილი პრობლემების გამო ეს გადაწყვეტილება არც ისე მალე იქნება მიღებული და თავად ფილმს 2022 წელზე ადრე არ უნდა ველოდოთ.

შეგახსენებთ, რომ პირველი ნაწილი, რომელიც ცნობილი პროექტის სპინ-ოფია, ეკრანებზე გასულ წელს გამოვიდა. ჯონსონის გარდა ფილმში მონაწილეობდნენ: ჯეისონ სტეტჰემი, ვანესა კირბი, იდრის ელბა, ჰელენ მიერები და სხვა ცნობილი მსახიობები. ფილმმა ვერ შეძლო ფორსაჟის ბოლო ნაწილების რეკორდის გამეორება, თუმცა ის მაინც წარმატებული აღმოჩნდა და 750 მილიონი დოლარი შეაგროვა. ხოლო ფილმის გადაღებაზე 200 მილიონი დოლარი დაიხარჯა.

აქვე გეტყვით, რომ პანდემიის გამო ფორსაჟის ბოლო ნაწილის პრემიერა ერთი წლით გადაიდო და 2021 წლის აპრილში შედგება.