ჯენიფერ ლოპესი და ალექს როდრიგესი ერთმანეთს დაშორდნენ

TMZ-ის და Page Six-ის ცნობით, ჯენიფერ ლოპესი და ალექს როდრიგესი ორწლიანი ნიშნობის შემდეგ, ერთმანეთს დაშორდნენ. გასულ ზაფხულს, წყვილი დიდებულ საქორწინო ცერემონიას გეგმავდა იტალიაში, თუმცა კორონავირუსის პანდემიამ მათი გეგმები შეაფერხა.

ჯენიფერ ლოპესი დომინიკელთა რესპუბლიკაში, ახალი ფილმის, Shotgun Wedding-ის გადაღებებზე იმყოფება. გასულ თვეს, ალექსი საყვარელ ქალს გადასაღებ მოედანზე ესტუმრა და წყვილმა „ინსტაგრამზე” მოსიყვარულე ფოტოებიც გააზიარა. TMZ-ის ცნობით, რამდენიმე წყარომ დაადასტურა, რომ „ეს განშორება გარდაუვალი იყო. უკვე დიდი ხანია, წყვილის ურთიერთობა ამ გადაწყვეტილებისკენ მიემართება”.

ჯენიფერ ლოპესს და ალექს როდრიგესს დაშორების შესახებ საჯარო განცხადება არ გაუკეთებიათ. რაც, მცირედ იმედს გვიტოვებს, რომ ეს მხოლოდ ჰოლივუდის მორიგი ჭორების კორიანტელია. ჯენიფერმა დღეს „ინსტაგრამზე” სთორი გამოაქვეყნა, რომელშიც მისი ყოფილი მეუღლე მარკ ენტონი და მათი საერთო შვილია აღბეჭდილი. „როდესაც (ბავშვები) მოწყენილები არიან, მაგრამ დედიკო და მამიკო მათ გვერდითაა”, – ვკითხულობთ აღწერაში.